Abantu bitwaje intwaro bivugwa ko bavuye mu ntara ya Kivu y'Epfo muri repubulika iharanira demokarasi ya Congo bateye mu ntara ya Bubanza mu burengerazuba bw'u Burundi barwana n'ingabo z'igihugu abaturage bamwe barahunga.

 

By Ubwanditsi | Views : 11466 | Kuya 10-22-2019 22:23



Urusaku rw'amasasu rwatangiye kumvikana mu gitondo cyo kuri uyu wa kabiri tariki ya 22 ukwakira 2019, abaturage bamwe batangaje ko bahise bahunga imirwano hagati y'ingabo n'inyeshyamba zabagabyeho igitero.

Uruhande rwa leta y'u Burundi ntacyo ruratangaza ku mirwano yabereye mu ntara ya Bubanza.

Fabien Banciryanino umudepite mu Burundi uvuka mu ntara ya Bubanza, yavuganye na BBC sa kumi n'igice kw'isaha ya Bubanza ari ku Musenyi muri iyi Ntara, ari gukurikirana ibiri kuba.

Yabwiye BBC ko amakuru yahawe n'abaturage bahungaga imirwano ari uko inyeshyamba zaje ziva muri Congo zikazamuka ahitwa mu Gatura zishaka kwinjira mu Kibira zigatangirwa n'abasirikare.

Igice cy'ishyamba ry'Ikibira ku ruhande rw'u Burundi izo nyeshyamba zashakaga kwinjiramo abaturage bavuga ko zifuza kuhashyira ibirindiro zishobora kujya zivamo zitera mu gihugu.

Bwana Banciryanino avuga ko abasirikare bari kurwana n'abateye bababuza kwinjira mu Kibira, kugeza ubu abagabye iki gitero ntabwo baramenyekana.

Mu mitwe irwanya ubutegetsi bw'u Burundi iri mu Ntara ya Kivu y'epfo aho bikekwa ko izi nyeshyamba zaba zaturutse havugwamo, Forces National de Liberation (FNL), Red Tabara, FNl-Nzabampemana, Forces Républicaines du Burundi (FOREBU).

Nta mutwe wo muri iyi uratangaza ko ari wo warwanye n'abasirikare b'u Burundi muri Bubanza.


Amazina
E-mail
Igitekerezo
 
 








Copyright © 2015 umurashi.rw | Desinged by Giganet Web Developers.Ltd