Ahagana isa mbiri za mugitondo nibwo ikipe ya Rayon sport yahagurutse i Kigali mu murwa mukuru w'u Rwanda yerekeza mu majyepfo y'igihugu igiye gushaka amanota 3 mu mukino uzayihuza na Mukura vs.   

Rayon sport yahagurutse iri kumwe n'abakinnyi bayo bose barimo n'abataragaragaye mu mukino wayihuje na Gicumbi FC mu mpera z'icyumweru cyashize, barimo Ndacyayisenga Jean d'Amour bakunze kwita Meyor warumaze iminsi arwaye malaria, hamwe n'umuzamu wayo mukuru, Ndayishimiye Jean Eric uzwi cyane ku izina rya Bakame nawe utari wakinnye uyu mukino.  

Bakame wanaraye yibarutse umwana w'umuhungu mu ijoro ryacyeye, mbere yo kwerekeza i Huye yaganiriye n'umurashi.rw atangaza ko bamanutse biteguye kwitwara neza bagakomeza gushimangira umwanya wa mbere. 

Rayon sport niyo iyoboye by'agateganyo urutonde rwa shampiyona n'amanota 22 igakurikirwa na APR FC ifite amanota 20.

Biteganyijwe ko nyuma yo kugera i Huye kuri uyu wa kane, mu masaha ya 15h00 bari bukore imyitozo, bakazahura na Mukura ku munsi w'ejo kuwa 5 tariki ya 16 ukuboza 2016, guhera isa 15h30 kuri stade ya Huye.